عشان انت مصرى وده للاسف

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى


عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت


عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

بجد عملتلى حالة من الاحباط
كنت فعلا محتجها بشدة
اصلى كنت مبسوط اوى
وعايز حد ينكد على
جزالك الله خيرا .

الله ينور يا رومو
بس دة من ابداعك ولا منقول؟؟
وبعدين فين المبدعين القنادلة

والله يا عم هي مش ناقصة
وبعدين مصر مالها ومال اللي انت بتقولة
القذارة دي في الحكام مش في مصر
لما نقول علي مصر كده يبقي احنا مش مصريين
العيب مش في مصر العيب فينا احنا
ايوة احنا سكتنا والحكومة بتدينا علي دماغنا وبرضوا احنا ساكتين
اسف علي التعليق البايخ
بس مش كل حاجة وحشة نقول عليها مصر
لالالالا بالعكس دا شعب مصر
كلامك جميل جدا ومتناسق بس للاسف انا مش راضي عنة

ارجوك متزعلش مني
تحياتي وتقديري
ابن مصر
k& g